Memoaret e lisit

• 

Me degët e mia

U bë kërruta e plakut

Nallet e grave

Drunjtë e oxhakut

 

Fyelli i bariut

Bishti i shatit

Kupa i supës

Tabuti i fshatit

 

Hunjtë e megjës

Kulmi i shtëpisë

Hamari i grurit

Shtrati i nusërisë

 

Pragu i odës

Arka e çeizit

Veku i Mihanes

Shkami i Idrizit

 

Dera e ahurit

Djepi i fëmijëve

Magjja, defi e zhvojca

Kaca e trushive

 

M’i prenë krahët

Trupin ma copëtuan

Me mua net kaluan 

Me mua u zgjuan

 

Me mua qeshën

Me mua qanë

Me mua u bashkuan 

Me mua u ndanë

 

Dhe tani Diellin nuk ua zë më

Hija e shpatullave të lisit

Tash më kanë vetëm në zemra e në kujtime

Se tani jam bërë - pjesë e fisit