Stinët e mia
Dimrit në kopshtin tim
I mungon imagjinata
Nuk di të qëndisë gjurmë të vockla fëmijësh
Me dordoleca
Me saja
Me topa bore
Me zëra gazmorë
Me trosha buke
Me zogj mali
Me këngë të bukura fëmijërore
Pranverës në kopshtin tim
I mungon dashuria
Lulet lindin e vdesin
Duke pritur duar të njoma
Të bëjnë buçeta për mua
Verës në kopshtin tim
I mungon ngrohtësia
Toka mbulohet
Me qershia të kalbura
Barin e përvëlon
Malli i fëmijëve
Vjeshtës në kopshtin tim
I mungon shpirti
Shiu thërret lojën
Vajton përqafimet e pamundshme
Gjethet plaken
E bien përdhe
Vdesin në vetmi